បន្ទាយមានជ័យ៖ ផលិតផលដើមកំណើតចេញពីសត្វមានទម្ងន់៧តោន វិចខ្ចប់គ្មានលក្ខណៈបច្ចេកទេសត្រឹមត្រូវនិងខូចគុណភាណ ត្រូវបានកម្លាំងចម្រុះខេត្តបន្ទាយមានជ័យ ត្រូវដកហូត និងយកទៅដុតកំទេចចោល។
សមត្ថកិច្ចចម្រុះបានរកឃើញនិងដកហូតផលិតផលដើមដំណើតចេញពីសត្វទម្ងន់៧តោននោះ នៅថ្ងៃទី១៥ ខែមិថុនា ឆ្នាំ២០២៣ ស្ថិតនៅក្បែរផ្សារត្រី ស្ថិតភូមិប៉ាលិលេយ្យ១ សង្កាត់/ក្រុងប៉ោយប៉ែត ខេត្តបន្ទាយមានជ័យ។
ប្រធានការិយាល័យផលិតកម្ម និងបសុព្យាបាលខេត្តបន្ទាយមានជ័យ លោក ហ៊ុយ ទូច បានឱ្យដឹងថា ក្រោយធ្វើការស្រាវជ្រាវ និងកំណត់មុខសញ្ញាហើយ មន្ត្រីអគ្គនាយកដ្ឋានសុខភាពសត្វ និងផលិតសត្វ បានសហការជាមួយមន្ត្រីការិយាល័យផលិតកម្ម និងបសុព្យាបាលខេត្ត ចុះពិនិត្យឃ្លាំងមួយកន្លែងដែលនាំទំនិញផលិតផលដើមកំណើតចេញពីសត្វ កំពុងស្តុកទុកនៅក្នុងឃ្លាំងជាង២០តោន ហើយត្រូវបានដកហូត៧តោន ដោយសារការរកឃើញ វិចខ្ចប់គ្មានលក្ខណៈបច្ចេកទេសត្រឹមត្រូវនិងខូចគុណភាព។
លោកបន្តឱ្យដឹងថា ក្រោយពិនិត្យទំនិញផលិតផលដើមកំណើតពីសត្វទម្ងន់៧តោន ត្រូវបានដកហូត មុខទំនិញវិចខ្ចប់គ្មានលក្ខណៈបច្ចេកទេសត្រឹមត្រូវ និងខូចគុណភាព ដោយព្រួយបារម្ភមានជម្ងឺផ្តាសាយបក្សី ដែលជាទំនិញដែលឈ្មួញជាម្ចាស់ឃ្លាំងនាំចូលពីប្រទេសថៃ ដើម្បីនាំចេញទៅលក់បន្តនៅតាមបណ្តាខេត្តមួយចំនួន។
ក្រោយពីធ្វើការដកហូតម្ចាស់ឃ្លាំងមន្ត្រីជំនាញបានយកទៅសួរនាំនៅការិយាល័យផលិតកម្ម និងបសុព្យាបាលខេត្ត ដើម្បីអនុវត្តបន្ត ចំណែកសាច់មាន់ប្រហិតចម្រុះដែលត្រូវដកហូតនោះនិងយកទៅដុតកំទេចចោលផងដែរ ៕